हाइकोउ, डिसेम्बर १८ । चीनले हैनान प्रान्तमा स्थापना गरिएको Hainan Free Trade Port मा टापु–व्यापी विशेष भन्सार सञ्चालन औपचारिक रूपमा सुरु गरेको छ । यस कदमलाई चीनको मुक्त व्यापार प्रवद्र्धन, उच्चस्तरीय खुलापन विस्तार र दीर्घकालीन आर्थिक संरचना सुधारतर्फको महत्वपूर्ण नीतिगत निर्णयका रूपमा लिइएको छ ।
चिनियाँ सरकारी समाचार संस्था Xinhua का अनुसार ३० हजार वर्ग किलोमिटरभन्दा बढी क्षेत्रफल भएको हैनान टापु अब पूर्ण रूपमा विशेष भन्सार निगरानी क्षेत्रमा समेटिएको छ । यस व्यवस्थाले विदेशी वस्तुको प्रवेशलाई सहज बनाउने, शून्य भन्सार (Zero tariff) को दायरा विस्तार गर्ने तथा आयात–निर्यात प्रक्रियालाई सरल बनाउने लक्ष्य राखेको छ ।
अर्थशास्त्रीहरूका अनुसार यस्तो भन्सार व्यवस्थाले चीनको समग्र अर्थतन्त्रमा उत्पादन लागत घटाउने र उद्योगहरूको अन्तर्राष्ट्रिय प्रतिस्पर्धात्मक क्षमता बढाउने अपेक्षा गरिएको छ । कच्चा पदार्थ, प्रविधि र औद्योगिक उपकरण सस्तो रूपमा आयत गर्न सकिने भएपछि घरेलु उत्पादन विस्तार हुने र निर्यात वृद्धिमा सहयोग पुग्ने अनुमान गरिएको छ ।
हैनान प्रान्तको अर्थतन्त्रका लागि यो नीति अझ महत्वपूर्ण मानिएको छ । विशेष भन्सार सञ्चालन र कर सहुलियतका कारण विदेशी लगानीकर्ताहरूलाई उत्पादन, लजिस्टिक्स, पर्यटन र सेवाक्षेत्रमा लगानी गर्न प्रोत्साहन मिल्नेछ । यसले नयाँ उद्योग स्थापना, रोजगारी सिर्जना र स्थानीय पूर्वाधार विकासलाई गति दिने अपेक्षा गरिएको छ ।
यस नीतिको प्रत्यक्ष लाभ आमनागरिकसम्म पुग्ने सरकारी अधिकारीहरूको दाबी छ । आयात लागत घट्दा उपभोग्य वस्तु, खाद्य सामग्री, औषधि तथा विद्युतीय उपकरणको मूल्य कम हुन सक्नेछ, जसले जीवनयापन खर्च घटाउने र उपभोक्ताको क्रयशक्ति बढाउने अपेक्षा गरिएको छ । साथै, लगानी विस्तारसँगै रोजगारीका अवसर बढ्दा स्थानीय बासिन्दाको आयस्तरमा सुधार आउने विश्वास गरिएको छ ।
क्याटेगोरी : अन्तर्राष्ट्रिय
थप समाचार
धेरै पढिएका
प्रतिक्रिया