पशुपतिनाथदेखि वैद्यनाथधाम ४ घण्टामै : २५० किमिको नयाँ हाई–स्पीड कोरिडोर घोषणा
काठमाडौं । नेपालको काठमाडौंबाट रहेको पशुपतिनाथ मन्दिर लाई भारतको झारखण्ड राज्यको देवघरस्थित वैद्यनाथ धाम सँग जोड्ने गरी २५० किलोमिटर लामो ‘पशुपतिनाथ–वैद्यनाथधाम हाई–स्पीड कोरिडोर’ निर्माण गर्ने प्रस्ताव अघि बढाइएको छ। उक्त एक्सप्रेसवे निर्माण सम्पन्न भएपछि हाल करिब १४ घण्टा लाग्ने यात्रा समय घटेर झन्डै ४ घण्टामा सीमित हुने अपेक्षा गरिएको छ।
बिहार सरकारले धार्मिक पर्यटन प्रवर्द्धन तथा क्षेत्रीय कनेक्टिभिटी सुदृढ गर्ने उद्देश्यले परियोजना अगाडि सारेको जनाएको छ। प्रस्तावित मार्ग काठमाडौंबाट सुरु भई भीमनगर र वीरपुर हुँदै भारतीय सीमामा प्रवेश गर्नेछ। त्यसपछि बिहारका सुपौल, मधेपुरा, सहरसा, खगडिया, मुंगेर र बाँका जिल्ला पार गर्दै झारखण्डको देवघरस्थित वैद्यनाथ धाममा पुग्ने योजना छ।
नेपालतर्फ निर्माणाधीन निजगढ–काठमाडौं द्रुतमार्ग सम्पन्न भएपछि काठमाडौंबाट भारतीय सीमासम्मको यात्रा अझ सहज हुने विश्वास गरिएको छ। सो द्रुतमार्ग र प्रस्तावित कोरिडोर सञ्चालनमा आएपछि हाल करिब ५३४ किलोमिटर रहेको दूरी घटेर २५० किलोमिटरमा सीमित हुने जनाइएको छ।
भारत नेपालका लागि प्रमुख पर्यटक स्रोत देश हो। उपलब्ध तथ्याङ्कअनुसार सन् २०२५ मा भारतबाट करिब २ लाख ९२ हजार पर्यटक नेपाल भित्रिएका थिए, जुन अघिल्लो वर्षको तुलनामा करिब २५ प्रतिशतले बढी हो। भारतबाट आउने पर्यटकमध्ये ठूलो हिस्सा धार्मिक उद्देश्यले यात्रा गर्ने अनुमान गरिएको छ।
भारतीय तीर्थयात्रीहरूको प्रमुख गन्तव्यमा पशुपतिनाथसँगै मुस्ताङस्थित मुक्तिनाथ मन्दिर, जनकपुरस्थित जनकपुरधाम, तथा रुपन्देहीस्थित लुम्बिनी लगायतका धार्मिक स्थलहरू पर्दछन्।
बिहार सरकारले परियोजनाको प्रस्ताव भारतको केन्द्र सरकारसमक्ष स्वीकृतिका लागि पठाइसकेको जनाएको छ। बिहार सरकारले आर्थिक वर्ष २०२६/२७ को बजेटमा सडक निर्माण परियोजनाहरूका लागि ८ हजार २६० करोड भारतीय रुपैयाँ छुट्याएको छ जसमा यस कोरिडोरलाई प्रमुख योजनाका रूपमा राखिएको छ। केन्द्रबाट स्वीकृति प्राप्त भएमा करिब पाँच वर्षभित्र निर्माण सम्पन्न गर्ने लक्ष्य राखिएको छ।
परियोजना सम्पन्न भएमा धार्मिक पर्यटनसँगै व्यापार, यातायात तथा क्षेत्रीय आर्थिक गतिविधिमा समेत उल्लेखनीय वृद्धि हुने अपेक्षा गरिएको छ।
क्याटेगोरी : अन्तर्राष्ट्रिय
थप समाचार
धेरै पढिएका
प्रतिक्रिया