सोभियतकालीन एउटा अन्तरिक्षयान केही दिनभित्र पृथ्वीमा खस्ने वैज्ञानिकहरूले बताएका छन् । सोभियत सङ्घले सन् १९७२ मा शुक्र ग्रहमा प्रक्षेपण गरेको कोस्मोस–४८२ को ल्यान्डिङ मोड्युल पृथ्वीमा खस्न लागेको वैज्ञानिकहरूलाई उद्धृत गर्दै बीबीसीले जनाएको छ ।
झन्डै ५ सय किलो तौल भएको त्यो यान पृथ्वीको कक्षमै अलपत्र परेको थियो । त्योभन्दा ४ दिनअघि प्रक्षेपण गरिएको भेनेरा ८ गन्तव्यमा पुगे पनि रकेटमा समस्या उत्पन्न भएपछि कोस्मोस–४८२ पृथ्वीको कक्षभन्दा माथि जान नसकेको हो ।
यान पृथ्वीमा खस्ने ठ्याक्कै मिति गणना गर्न नसकेको तर मे महिनाको ८ देखि १४ तारिखभित्र खस्न सक्ने वैज्ञानिकहरूको भनाइ छ । यस्तै यान खस्ने ठाउँ पनि यकिन छैन । यानको मार्ग इजिप्ट, सिरिया, टर्की र अजरबैजानमाथि भएकाले अवशेषहरू ती देशमा मानिसहरू बस्ने भू–भागमा खस्न सक्ने जोखिम छ ।
अन्तरिक्षयानहरू पृथ्वीको वायुमण्डलमा खण्डित भई जल्दा वा ती कहाँ, कहिले र कसरी खस्छन् भन्ने कुरामा प्राविधिकहरूको नियन्त्रण हुँदा खासै ठूलो समस्या हुँदैन । तर यो यान पृथ्वीमा खस्दा वैज्ञानिकहरूले कुनै प्रकारको नियन्त्रण कायम गर्न सक्दैनन् । अर्को डरलाग्दो कुरा के हो भने खस्ने क्रममा वायुमण्डलमा नजल्न सक्छ ।
क्याटेगोरी : अन्तर्राष्ट्रिय, विज्ञान
थप समाचार
धेरै पढिएका
प्रतिक्रिया