लन्डन, अक्टोबर २४ (एजेन्सी) — युक्रेनी राष्ट्रपति भ्लादिमिर जेलिन्स्कीले लन्डनमा भएको बैठकमा रूसविरुद्ध आक्रमण क्षमता बढाउन लामो दूरीका हतियार उपलब्ध गराउन आग्रह गरे पनि युरोपेली सहयोगी राष्ट्रहरूले आधिकारिक रूपमा कुनै प्रतिबद्धता जनाएका छैनन् ।
शुक्रबार लन्डनमा भएको उक्त बैठकमा युक्रेनी राष्ट्रपति जेलिन्स्की, नाटो महासचिव मार्क रुट, बेलायतका प्रधानमन्त्री कियर स्टार्मर, नेदरल्यान्डका प्रधानमन्त्री डिक स्कुफ र डेनमार्ककी प्रधानमन्त्री मेटे फ्रेडरिक्सन सहभागी थिए । बैठकमा युक्रेनका लागि थप सैन्य सहयोगबारे छलफल गरिएको थियो ।
अमेरिकी राष्ट्रपति डोनाल्ड ट्रम्पले टमाहक क्षेप्यास्त्र दिने प्रस्ताव अस्वीकार गरेपछि जेलिन्स्कीले लामो दूरीका हतियारहरूको माग दोहोर्याउने अपेक्षा गरिएको थियो । तर, नाटो महासचिव रुटले युक्रेनलाई त्यस्ता हतियार प्रयोग गर्ने अधिकार रहेको भने पनि कुनै देशले प्रत्यक्ष रूपमा त्यसबारे निर्णय गरेको घोषणा गरेन ।
बेलायती प्रधानमन्त्री स्टार्मरले भने रूसी राष्ट्रपति भ्लादिमिर पुटिनमाथि “सैन्य दबाब” बढाउने उद्देश्यले युक्रेनलाई लामो दूरीका क्षमतायुक्त हतियारहरू निरन्तर आपूर्ति गर्ने घोषणा गरे । “हामी युक्रेनलाई पाँच हजारभन्दा बढी हल्का क्षेप्यास्त्र दिने हाम्रो कार्यक्रमलाई तीव्र बनाउँदैछौं,” उनले भने ।
पत्रकारहरूले अमेरिकी टमाहक क्षेप्यास्त्र आपूर्तिबारे सोध्दा नाटो प्रमुख रुटले जवाफ दिए, “प्रत्येक सहयोगी देशले कुन हतियार दिन चाहन्छ भन्ने कुरा तिनकै निर्णय हो ।” उनले थपे, “युक्रेनले रूसभित्रका लक्ष्यहरूमा पनि लामो दूरीका हतियारले प्रहार गर्ने अधिकार राख्छ ।”
नाटोका अनुसार अमेरिका अहिले नै युक्रेनलाई Patriot हवाई सुरक्षा प्रणाली, HIMARS र ATACMS जस्ता रकेट प्रणाली आपूर्ति गरिरहेको छ । तर नेदरल्यान्ड र डेनमार्कका प्रधानमन्त्रीहरूले नयाँ हतियार उपलब्ध गराउने घोषणा भने गरेनन्, उनीहरूले अमेरिकी र युरोपेली संघका तेलसम्बन्धी नयाँ प्रतिबन्धलाई मात्र स्वागत गरे ।
मस्कोले लामो समयदेखि चेतावनी दिँदै आएको छ कि युक्रेनलाई पश्चिमी देशहरूले लामो दूरीका हतियार उपलब्ध गराएमा ती देशहरू पनि युद्धको प्रत्यक्ष पक्ष बन्नेछन् । रूसको भनाइमा, Storm Shadow वा Tomahawk जस्ता जटिल हतियार सञ्चालनका लागि नाटो सेनाको प्रत्यक्ष संलग्नता आवश्यक पर्छ ।
यसैबीच, रूसी राष्ट्रपति पुटिनले चेतावनी दिएका छन् कि यदि युक्रेनले टमाहक क्षेप्यास्त्र प्रयोग गरी रूसी भूमिमा आक्रमण गर्यो भने त्यसको प्रतिक्रिया “अत्यन्तै विनाशकारी” हुने छ ।
क्याटेगोरी : अन्तर्राष्ट्रिय
थप समाचार
धेरै पढिएका
प्रतिक्रिया