काठमाडौं । सिन्धुलीको मरिण गाउँपालिकाका अध्यक्ष विमर्श मोक्तान विरुद्ध आर्थिक अनियमितता लगायत विभिन्न विषयमा उजुरी परेका छन्। उनीविरुद्ध करिब आधा दर्जन उजुरी अख्तियार दुरुपयोग अनुसन्धान आयोग मा दर्ता भएको बताइएको छ।
उजुरीहरूमा पालिकाभित्र आर्थिक अनियमितता, ठेक्का व्यवस्थापनमा गडबडी तथा प्रशासनिक प्रक्रियामा पारदर्शिताको अभाव रहेको आरोप लगाइएको छ। यस्ता विषयहरूले स्थानीय तहको सुशासन र जिम्मेवारीमाथि प्रश्न उठाएको छ।
मोक्तानमाथि शैक्षिक योग्यतासम्बन्धी विवाद पनि उठेको चर्चा छ। उनका शैक्षिक परीक्षामा अरू व्यक्तिलाई ‘खेताला’ लगाएर परीक्षा दिलाइएको आरोप सार्वजनिक रूपमा उठेको बताइन्छ। यद्यपि यस विषयमा आधिकारिक निकायबाट अन्तिम निष्कर्ष भने सार्वजनिक भएको छैन।
अध्यक्ष मोक्तानको पुष्पकमल दाहाल (प्रचण्ड) र उनको परिवारसँग निकट सम्बन्ध रहेको चर्चा पनि स्थानीय स्तरमा हुने गरेको बताइन्छ।
यसैबीच मरिण गाउँपालिकाभित्र प्रशासनिक विवादसमेत देखिएको छ। पालिकाका प्रमुख प्रशासकीय अधिकृत संजित बुढाथोकी र अध्यक्ष मोक्तानबीच सम्बन्ध बिग्रिएको बताइन्छ। पालिकाभित्र देखिएका केही अनियमिततामा साथ नदिएको कारण बुढाथोकीलाई कामविहीन बनाइएको आरोप लागेको छ।
नियमित प्रशासनिक जिम्मेवारीमा रहने प्रमुख प्रशासकीय अधिकृतलाई जिम्मेवारीबाट अलग राखेर करारका कर्मचारीलाई महत्त्वपूर्ण जिम्मेवारी दिइएको दाबी पनि गरिएको छ।
यस विषयमा प्रमुख प्रशासकीय अधिकृत बुढाथोकीले सामाजिक सञ्जालमार्फत असन्तुष्टि व्यक्त गरेका छन्। उनले फेसबुकमा लेख्दै पालिकाभित्र देखिएको प्रशासनिक हस्तक्षेप र नियमविपरीत गतिविधिबारे संकेत गरेका छन्।
स्थानीय तहमा निर्वाचित प्रतिनिधिबाट विकास र सेवा प्रवाहको अपेक्षा गरिन्छ। तर नेतृत्वमाथि नै अनियमितताका आरोप लाग्दा र प्रशासनिक टकराव बढ्दा स्थानीय सरकारप्रतिको जनविश्वास कमजोर हुन सक्ने सरोकारवालाहरू बताउँछन्।
त्यसैले अख्तियारमा पुगेका उजुरीहरूको निष्पक्ष अनुसन्धान भई तथ्य सार्वजनिक हुनु आवश्यक रहेको स्थानीयको माग छ।
क्याटेगोरी :
समाचार
थप समाचार
धेरै पढिएका
प्रतिक्रिया