नोबेलले रेडिएसन थेरापीको अत्याधुनिक उपकरण ‘EDGE’ सहित सुरु गर्यो क्यान्सर उपचार सेवा
नेपालमा क्यान्सर उपचारमा नयाँ युगको सुरुवात भएको छ । विराटनगरस्थित नोबेल मेडिकल कलेजले ३ अर्ब ४० करोड रुपैयाँको लगानीमा अत्याधुनिक रेडिएसन थेरापी सेवा सुरु गरेको छ । नेपालमै पहिलोपटक सञ्चालनमा आएको अमेरिकामा निर्मित भेरियन कम्पनीको ‘EDGE’ नामक उपकरण क्यान्सर उपचारका लागि उच्च प्रविधियुक्त मानिन्छ । यो उपकरण दक्षिण एसियामा केवल छ स्थानमा मात्र उपलब्ध छ ।
नोबेल मेडिकल कलेजका संस्थापक एवं नेपाली कांग्रेसका सांसद डा. सुनिल शर्माको नेतृत्वमा यो सेवा सुरु भएको हो । आम नागरिकको स्वास्थ्यलाई प्राथमिकतामा राख्दै डा. शर्माले आधुनिक क्यान्सर उपचारका लागि नवीनतम उपकरण, दक्ष जनशक्ति र गुणस्तरीय स्वास्थ्य सेवाको सुनिश्चितता गरेका छन् ।
अत्याधुनिक प्रविधि र सुविधाहरू
‘EDGE’ रेडिएसन थेरापी उपकरण शल्यक्रियाविना नै क्यान्सर सेललाई निशाना बनाउन सक्षम छ । यसमा रहेको ६डी काउच, हाइपर आर्क, एचडी एमआईसी, एसआरएस र एसबीआरटीले शल्यक्रियाविना क्यान्सर सेललाई मात्र लक्षित गरी सामान्य सेललाई कुनै क्षति पुर्याउँदैन । यो प्रविधि क्यान्सर उपचारमा विश्वकै अत्याधुनिक मानिन्छ । साथै, ब्राकी थेरापीले उपकरणको सहायताले विना दुःखाइ शरीरभित्रै पुगेर क्यान्सर सेललाई नष्ट गर्ने सुविधा प्रदान गर्दछ ।
यसका साथै, ४डी आरटीसीटी नामक सीटी स्क्यान मेशिनले रेडिएसन थेरापीलाई थप प्रभावकारी बनाउँछ । नोबेल मेडिकल कलेजमा दैनिक ओपीडी, प्रयोगशाला परीक्षण, एक्स-रे, सीटी स्क्यान, एमआरआई, केमो थेरापी, शल्यक्रिया र रेडिएसन थेरापीजस्ता सेवा उपलब्ध छन् ।
गरिबका लागि उपचारमा विशेष व्यवस्था
नोबेल मेडिकल कलेजले नेपाल सरकारको विपन्न नागरिक औषधि उपचार कोषअन्तर्गत क्यान्सर रोगीलाई सेवा प्रदान गर्दै आएको छ । यसले विशेषगरी आर्थिक रूपले कमजोर वर्गका रोगीलाई ठूलो राहत दिएको छ । सामाजिक सेवा इकाईमार्फत् यस्तो सेवाको सहजीकरण गर्दै आएको छ ।
डा. शर्माले आफ्नो निर्वाचन क्षेत्रका नागरिकलाई निःशुल्क क्याबिनको व्यवस्था गरेका छन् भने काठमाडौंको सिनामंगलस्थित काठमाडौं मेडिकल कलेजमा पनि गरिब तथा आर्थिक रूपमा विपन्न बिरामीलाई निःशुल्क उपचार सेवा प्रदान गर्दै आएका छन् ।
पूर्वाधार विकास र सामुदायिक सेवा
नोबेल मेडिकल कलेजलाई एसियाकै प्रतिष्ठित अस्पतालका रूपमा विकास गर्न डा. शर्माले ठूलो प्रयास गरेका छन् । क्यान्सर उपचारका लागि अत्याधुनिक उपकरण मात्र नभई दक्ष जनशक्ति, विशेष भवन र विश्वस्तरीय सुविधाहरूको व्यवस्था गरी उनले क्यान्सर रोगीका लागि सहज वातावरण तयार गरेका छन् ।
सांसद डा. शर्माले नेपालका विभिन्न स्थानमा निःशुल्क स्वास्थ्य शिविर सञ्चालन गरेर लाखौं बिरामीलाई सेवा दिएका छन् । शिविरमा उपचार गर्न नसकिने बिरामीलाई काठमाडौं मेडिकल कलेज वा नोबेल मेडिकल कलेजमा निःशुल्क उपचार गराउने व्यवस्था उनले गरेका छन् ।
नेपालमै क्यान्सर उपचारको नयाँ युग
नोबेल मेडिकल कलेजमा ‘EDGE’ प्रविधिको आगमनसँगै नेपालमा क्यान्सर उपचारका लागि नयाँ युगको सुरुवात भएको छ । यसले नेपाली नागरिकलाई महँगो उपचारका लागि विदेश जानुपर्ने बाध्यतालाई अन्त्य गर्ने विश्वास गरिएको छ ।
क्याटेगोरी : स्वास्थ्य
थप समाचार
धेरै पढिएका
प्रतिक्रिया