वर्षमानसँगको भेटमा बिजेपी नेता चौथाइवाले : राजावादीहरूले गरेको आन्दोलनमा भारतको कुनै सहयोग र समर्थन छैन
काठमाडौं, १९ वैशाख । नेपाल भ्रमणमा रहेका भारतीय जनता पार्टी (बिजेपी) का विदेश विभाग प्रमुख विजय चौथाईवालेले नेकपा माओवादी केन्द्रका उपमहासचिव वर्षमान पुन अनन्तलाई भेटेका छन्।
दुई नेताबीच शुक्रबार भेटवार्ता भएको हो। भेटका क्रममा चौथाईवालेले नेपालमा राजावादीहरूले गरेको आन्दोलनमा भारतको कुनै सहयोग, समर्थन र सद्भाव नरहेको बताएको पुनले जानकारी दिए।
‘भारत राजतन्त्रको पक्षमा छैन र त्यसका लागि भएका आन्दोलनमा सहयोग, समर्थन र सदभाव छैन’, चौथाईवालेको भनाइ उद्धृत गर्दै पुनले भने। भारतको जम्मू–कश्मीर क्षेत्रस्थित पलगाममा गत ९ वैशाखमा भएको हमलाप्रति नेपाल सरकार, नेपालका राजनीतिक दल तथा नागरिक तवरबाट निन्दा भएकोप्रति चौथाईवालेले खुसी व्यक्त गरेका थिए।
उक्त आक्रमणमा नेपाली नागरिक सुदीप न्यौपानेसहित २७ जनाको ज्यान नगएको थियो। ‘आतंकवादविरुद्ध नेपालले जनाएको ऐक्यबद्धताप्रति सराहना गर्न चाहन्छु’, चौथाइवालेले पुनसँग भनेका थिए ।
चौथाइवालेसँग माओवादी केन्द्र र भाजपाबीचको सम्बन्धबारे पनि कुराकानी भएको जानकारी पुनले दिए। आफूहरूले दुई दलबीच विगतदेखिकै भाइचारा सम्बन्ध आगामी दिनमा थप सुदृढ भएर जाने विश्वास आपसमा व्यक्त गरेको उनको भनाइ थियो ।
त्यस क्रममा चौथाइवालेले नेपाल–भारत सम्बन्ध सुदृढ गर्न पूर्ववर्ती पुष्पकमल दाहाल प्रचण्ड नेतृत्वको सरकारले खेलेको भूमिकाको पनि प्रशंसा गरेको पुनले उल्लेख गरे ।
क्याटेगोरी : राजनीति
थप समाचार
धेरै पढिएका
प्रतिक्रिया