ट्रम्प शासन आजबाट शुरु भएसँगै अमेरिकी शेयर बजार अस्थीर हुने विश्लेषकहरुको भविश्यवाणी
अमेरिकामा नवनिर्वाचित राष्ट्रपति डोनाल्ड ट्रम्पको शासन शुरु हुन अब केही घण्टा मात्र बाँकी छ । र, त्योसँग सँगै अमेरिकामा मात्र होइन, विश्वभर नै अनेक शंका आशंकाहरु व्यक्त भइरहेका छन् ।
‘अब के होला ?’
अहिले यो प्रश्न चौतर्फीरुपमा उठिरहेको छ । विश्वको राजनीतिमा,आर्थिक क्षेत्रमा मुख्य प्रतिस्पर्धी रहेका अमेरिका—चीन सम्वन्धमा, अमेरिकाको आप्रवासन नीतिमा र स्टक मार्केटसम्ममा अहिले प्रश्नहरु उठिरहेका छन् ।
भनिरहनु नपर्ला, यी प्रश्नहरु उनी पहिलो पटक राष्ट्रपति हुँदा सन् २०१७ मा पनि उठेका थिए । उनको त्यो शासनकाल हेर्दा जति शुरुमा जति ‘आतंक’ मच्चिएको थियो, शासनकालको दौरान खासै त्यस्तो भएन ।
के यसपटक विगतको भन्दा फरक, साँच्चै नै फरक होला ? र,आशंका गरिएझै ‘ट्रम्पोनोमिक्स’ले विश्वको अर्थतन्त्रको दिशा बदल्ला रु
सबैभन्दा पहिले कुरा गरौं स्टक मार्केटको ।
ट्रम्पको सपथ ग्रहणको दिन सोमबार,मार्टिन लुथर किंगको जन्मदिन भएकोले अमेरिकामा सार्वजनिक विदा दिइन्छ । त्यसको अर्थ स्टक मार्केटहरु बन्द हुन्छन् । त्यसैले आइतबार नियमित साप्ताहिक सार्वजनिक विदा र सोमवार मार्टिन लुथर किंगको जन्मजयन्ती मनाउन दिइने विशेष विदा भएकोले राष्ट्रपति ट्रम्पको शासन व्यवस्थालाई स्टक मार्केटले कसरी लिनेछ भन्ने कुरा मंगलबार बल्ल स्पष्ट हुनेछ ।
नोभेम्बरमा ट्रम्पले चुनाव जिते लगत्तै अमेरिकी शेयर बजारमा एक किसिमको उछाल आएको थियो । र, धेरै शेयर विश्लेषकहरु ट्रम्पको शासनलाई शेयर बजारले निकै तगडारुपमा शुभकामना दिएको थियो ।
यद्यपि, नयाँ वर्षको सुरुवातमा गति रोकियो र बजार धिमा गतिमा अगाडि बढ्यो । ट्रम्पको सपथ ग्रहणपछि अब के होला ? एक, दुई दिनपछि स्पष्ट हुनेछ ।
इन्टरएक्टिभ ब्रोकर्सका वरिष्ठ अर्थशास्त्री जोसे टोरेसको भनाईलाई मान्ने हो भने ट्रम्प शुरुदेखि नै भन्सार र करका दरहरुमा ठूलो फेरबदल गर्ने तयारीमा छन् । त्यसको सोझो असर शेयर बजारमा पर्न सक्छ । त्यो भनेको शेयर बजारको गतिलाई नियन्त्रण गर्नु नै हो । खासगरी चिनिया लगानीलाई नियन्त्रण गर्ने,अमेरिकामा कारोबार गरिरहेका चिनिया कम्पनीका उत्पादनहरुमाथि पनि कडाई गर्ने ट्रम्पको योजनाले अमेरिकी पूंजी बजारलाई धक्का दिन सक्ने विश्लेषकहरुको भनाइ छ ।
रेमन्ड जेम्सका प्रमुख लगानी अधिकृत ल्यारी एडमको भनाइ त अझ गम्भीर छ । उनी भन्छन् अबको समय शेयर बजारमा साँच्चै अनिश्चितताको समय हो । त्यसैले तपाई अमेरिकी शेयर बजारमा लगानी गर्न चाहानुहुन्छ सन् २०२५ भन्दा पनि धेरै परको समयलाई सोचेर लगानी गर्नुस् ।
अमेरिकी शेयर बजार विश्लेषक जेसन प्राइडको भनाइ पनि रेमण्ड जेम्सको जस्तै छ । उनी भन्छन् तपाईले बुझ्नुहोस्, अब बजारमा अप्रत्याशित मोडहरू अपरिहार्य बनेका छन् र लगानीकर्ताहरूमा अन्योलता आउंदैछ,बजार अस्थिर हुँदैछ,त्यस्तो अवस्थाको बीचमा म टिक्छु,सफल हुन्छु भन्ने आत्मविश्वासका साथ लगानी गर्नुस्, कमजोर आत्म विश्वांसले तपाई बजारमा टिक्न सक्नुहुन्न ।
क्याटेगोरी : अन्तर्राष्ट्रिय, अर्थ
थप समाचार
धेरै पढिएका
प्रतिक्रिया