९ वैशाख, काठमाडौं । विद्यालय शिक्षा ऐन जारी गर्न माग गर्दै आन्दोलनरत शिक्षकहरूले आफ्नो आन्दोलन २१ औं दिनमा प्रवेश गरिसकेका छन्। काठमाडौंको बबरमहलदेखि नयाँ बानेश्वरसम्मको सडकखण्ड आज पनि शिक्षकहरूको नाचगान, प्रदर्शन र नाराबाजीले गुञ्जायमान रह्यो।
सरकारसँग वार्ता र आश्वासनका प्रयास भइरहे पनि शिक्षकहरू आफ्नो अडानबाट पछि हटेका छैनन्। विद्यालय शिक्षा विधेयक जारी नगरेसम्म विद्यालय नफर्किने अडानमा उभिएका उनीहरू शान्तिपूर्ण तर कलात्मक आन्दोलनमार्फत आफ्नो असन्तोष व्यक्त गरिरहेका छन्।
शिक्षामन्त्री विद्या भट्टराईको सोमबारको राजीनामाले आन्दोलन झनै जटिल बनाएको छ। सरकारले वैशाख १२ गतेका लागि बजेट अधिवेशन बोलाएको र त्यसै अधिवेशनबाट शिक्षा ऐन जारी गर्ने स्पष्ट प्रतिबद्धता जनाए तापनि शिक्षकहरू सरकारका विगतका अनुभवका आधारमा अझै पनि सशंकित छन्।
यता आन्दोलनले विद्यालयको नयाँ शैक्षिक सत्र प्रभावित भएको छ। करिब ५५ लाख बालबालिकाको शिक्षामा असर परिरहेको भन्दै शिक्षकहरूको आलोचना पनि हुन थालेको छ। सोमबार एक अभिभावकलाई शिक्षकहरूले कुटपिट गरेको घटनाले आन्दोलनको स्वरुपप्रति पनि प्रश्न उठेको छ। शिक्षकहरूले अभिभावकको आन्दोलनको स्वरुप परिवर्तन गर्न आग्रहप्रति आक्रोश व्यक्त गर्दै आक्रमण गरेका थिए।
अभिभावकहरूले आन्दोलन अन्त्य गर्न राष्ट्रिय मानव अधिकार आयोगसम्म ध्यानाकर्षण गराइसकेका छन्। तर, शिक्षकहरू भने शिक्षा विधेयक जारी भएपछि मात्र आन्दोलन अन्त्य गर्ने अडानमा कायम छन्।
शिक्षा प्रणालीको स्थायित्व र शिक्षकहरूको माग दुबै संवेदनशील विषय हुन्। यस्तोमा सरकार र आन्दोलनरत पक्षबीच विश्वासको पुल निर्माण गरी तटस्थ समाधान खोजिनु आजको आवश्यकता हो।
क्याटेगोरी : समाचार
थप समाचार
धेरै पढिएका
प्रतिक्रिया