काठमाडौं, ४जेठ । रसुवामा ठूलो परिमाणमा सुन बरामद भएको छ। प्रमुख जिल्ला अधिकारी अर्जुन पौडेलले आइतबार सुन बरामद भएको बताए । रसुवा भन्सार नाकाबाट सुन बरामद भएको हो । चीनबाट भित्र्याउँदै गर्दा भन्सार नाकाबाट प्रहरीले सुन बरामद गरेको हो ।
‘सुन बरामद भएर भन्सारमा पठाइएको छ,’ प्रमुख जिल्ला अधिकारीले भने, ‘बरामद भएको सुनको मात्रा यकिन गर्न बाँकी छ।’ उनकाअनुसार सात वटा बिस्कुट बरामद भएको हो। एक जना गाडी चालकबाट उक्त सुन बरामद भएको हो।
जिल्ला प्रहरी कार्यालय रसुवाका डिएसपी हेमबहादुर शाहीका अनुसार अन्दाजी सात किलो ६५३ ग्रामको सुन जस्तो पहेँलो धातु बरामद गरेको बताए। ‘धातु परीक्षण गर्न बाँकी नै छ। सात किलो ६५३ ग्राम सुन जस्तो पहेँलो धातु बरामद भएको छ। हामीले चालकलाई नियन्त्रणमा लिएका छौं,’ उनले भने।
बा ४ ख ६२०१ नम्बरको गाडी केरूङबाट काठमाडौं आउँदै गर्दा आइतबार दिउँसो साढे १ बजे प्रहरीले बरामद गरेको हो। प्रहरीले चालकको परिचय खुलाइसकेको छैन।
क्याटेगोरी : समाचार
थप समाचार
धेरै पढिएका
प्रतिक्रिया