काठमाडौं । नेपाली कांग्रेसका वरिष्ठ नेता डा. शेखर कोइराला नेतृत्वको समूहले हालै पार्टीमा चलेको अनुशासन कारबाहीप्रति कडा आपत्ति जनाएको छ । सोमबार डा.कोइरालाको विशालनगरस्थित सम्पर्क कार्यालयमा बसेको भेलाले पार्टीले पछिल्लो समय विभिन्न नेताहरूमाथि एकतर्फी र विधानविपरीत ढंगले कारबाही अघि बढाएको भन्दै त्यसको विरोध गर्ने निर्णय गरेको हो ।
भेलामा सहभागी नेताहरूका अनुसार कांग्रेस केन्द्रीय अनुशासन समितिले हालै केही नेता तथा कार्यकर्तालाई निष्कासन र निलम्बन गर्ने निर्णय गर्दै सार्वजनिक गरेको विज्ञप्तिप्रति डा. कोइराला पक्ष निकै असन्तुष्ट देखिएको छ । उनीहरूको आरोप छ ‘यो प्रक्रिया पार्टीको विधान, आन्तरिक सहमति र न्यायको मर्म विपरीत छ ।’
बैठकमा सहभागी नेताहरूले कारबाहीमा परेकामध्ये कोही पनि अन्यायमा नपर्नुपर्ने अडान राखेका छन् । उनीहरूले सबैलाई न्याय दिलाएरै छाड्ने प्रतिबद्धता जनाएका छन् । डा. कोइरालाका स्वकीय सचिव दिनेश थपलियाले दिएको जानकारी अनुसार, भेलाले पार्टी सभापति शेरबहादुर देउवालाई कारबाही प्रक्रिया तत्काल रोक्न आग्रह गर्ने निर्णय गरेको छ । साथै, राजनीतिक रुपमा पनि सशक्त प्रतिरोध गर्ने तथा यस्तो निर्णय स्वीकार नगर्ने निर्णय भेलाले गरेको थपलियाले बताए ।
उपसभापति धनराज गुरुङले पार्टीको शीर्ष तहमा सहमति भइसकेको बेला अनुशासन समितिले एकपक्षीय निर्णय गर्दै कारबाही सार्वजनिक गर्नु आपत्तिजनक भएको बताए । उनका अनुसार, सभापति देउवा, उपसभापतिद्वय र महामन्त्रीद्वय गरी पाँच जना नेताबीच
अनुशासनसम्बन्धी फाइल अगाडि नबढाउने सहमति भएको थियो । तर समितिका संयोजक आनन्द ढुङ्गानाले त्यस सहमतिलाई बेवास्ता गर्दै समितिमै छलफल नगरी कारबाहीको विज्ञप्ति जारी गरेका कारण प्रतिकार अपरिहार्य भएको गुरुङले बताएका छन् ।
बुधबार नेपाली कांग्रेस केन्द्रीय अनुशासन समितिले स्थानीय, प्रदेश तथा संघीय निर्वाचनमा पार्टीका वा पार्टीले समर्थन गरेका उम्मेदवारलाई हराउन षड्यन्त्रपूर्वक भूमिका खेलेको भन्दै केही नेता तथा कार्यकर्तामाथि कारबाही गरेको थियो । समितिले केहीलाई निष्कासन, केहीलाई निलम्बन गर्ने निर्णय सार्वजनिक गरेको थियो । तर कारबाहीका आधार, प्रक्रिया र त्यसबारे पूर्वसूचना नदिइकन निर्णय लिइएको भन्दै आलोचना चुलिएको छ ।
कांग्रेसभित्र गहिरिँदो मतभेद
अनुशासन कारबाहीको विषयले कांग्रेसभित्र विद्यमान आन्तरिक मतभेद गहिरिएको पुष्टि हुन्छ । कोइराला पक्षले यसलाई ‘एकपक्षीय निर्णय र बदनियतपूर्ण कदम’ भनेको छ । पार्टीको आन्तरिक लोकतन्त्र र विधिप्रति विश्वास नगरी गरिएको निर्णयले संगठन कमजोर बन्ने खतरा औंल्याइएको छ ।
विशालनगरमा बसेको बैठकमा उपसभापति धनराज गुरुङ, सहमहामन्त्री जीवन परियार, नेता अर्जुननरसिंह केसी, बलबहादुर केसी, अनुशासन समिति सदस्य संजय गौतम लगायत काठमाडौंमा उपलब्ध केन्द्रीय सदस्यहरू सहभागी थिए । उनीहरू सबैले पार्टीको अनुशासन कार्यान्वयनको नाममा चलाइएको एकपक्षीय प्रक्रियालाई अस्वीकार गर्दै त्यसविरुद्ध व्यापक अभियान चलाउने तयारी गरेका छन् ।
नेपाली कांग्रेसजस्तो पुरानो र लोकतान्त्रिक मूल्यमा आधारित पार्टीभित्र अनुशासनको नाममा स्वेच्छाचारी निर्णय भइरहँदा आन्तरिक विवाद झनै गहिरिने संकेत देखिएको छ । शेखर कोइराला समूहले उठाएको आपत्ति र न्यायको पक्षमा देखाइएको दृढताले पार्टीभित्र गम्भीर पुनर्विचार आवश्यक भएको स्पष्ट देखिन्छ । अब नेतृत्वले सहमतिका आधारमा अघि बढ्ने कि अझै विभाजनलाई तीव्र बनाउने भन्ने प्रश्न कांग्रेसभित्र उब्जिएको छ ।
क्याटेगोरी : समाचार
थप समाचार
धेरै पढिएका
प्रतिक्रिया