काठमाडौं । वैदिक सनातन परम्पराअनुसार विशेष महत्वको महिनाका रूपमा चिनिने साउनको पहिलो सोमबार आज पशुपतिनाथ मन्दिर क्षेत्रमा भक्तजनहरूको अपार भीड देखिएको छ । बिहान सबेरै ३ बजेदेखि नै मन्दिरका चारैवटा ढोका श्रद्धालुहरूको लागि खोलिएको थियो । यो क्रम साउनको चारै वटा सोमबार जारी रहने पशुपति क्षेत्र विकास समितिले जनाएको छ ।
साउन महिनालाई भगवान् शिवको प्रिय महिना मानिन्छ । विशेषगरी सोमबारका दिन शिवको व्रत, उपवास, पूजा र दर्शन गरेमा मनोकामना पूरा हुने धार्मिक आस्थाले देशभरका शिवालयमा श्रद्धालुको भीड लाग्ने गर्छ । राजधानीस्थित पशुपतिनाथ मन्दिरमा भने साउन महिना शुरु भएदेखि नै भक्तजनहरूको चाप बाक्लो देखिएको छ ।
विशेष गरी महिलाहरू सोमबार विधिपूर्वक व्रत बसी शिवालयमा पूजा गर्छन् । सोमबारका दिन बिहानै उठी स्नान गरी शिवको नामस्मरणसहित मन्दिर दर्शन गरेमा मनोकांक्षा पूरा हुने र सौभाग्य प्राप्त हुने धार्मिक विश्वास रहिआएको छ ।
पशुपति क्षेत्र विकास कोष अन्तर्गत संस्कृति संरक्षण महाशाखाका प्रमुख अरुण विसेटका अनुसार, आज दिनभर करिब पाँच लाख भक्तजनले मूल मन्दिर प्रवेश गरी भगवान पशुपतिनाथको दर्शन गर्ने अनुमान गरिएको छ । सो अनुसार व्यवस्थापन, सुरक्षाको प्रत्याभूति र भक्तजनलाई सहज पहुँच सुनिश्चित गर्न व्यापक तयारी गरिएको कोषले जनाएको छ ।
साउन महिनाको सोमबार विशेष रूपमा भगवान् शिवको आराधना गर्ने दिनका रूपमा हिन्दू धर्मावलम्बीले व्रत बसेर पूजाआजा गर्ने परम्परा छ ।
आज पशुपतिनाथ लगायत काठमाडौंका सबै शिव मन्दिरहरुमा बिहानैदेखि भक्तजनको बाक्लो उपस्थिति देखिएको छ ।
यसवर्ष साउने सोमबारका लागि कोषले विशेष पूजाका लागि न्यूनतम रु ७,५०० को टिकट व्यवस्था गरेको जनाएको छ । यो टिकट बिना विशेष पूजामा सहभागी हुन नपाइने कोषले स्पष्ट पारेको छ । भक्तजनको व्यवस्थापनमा सहजता ल्याउन र अनावश्यक भीड व्यवस्थापन गर्न यो नीति लागु गरिएको जनाइएको छ ।
भक्तजनको सेवा र सहयोगका लागि विभिन्न सामाजिक संस्थाहरू समेत अग्रसर भएका छन् । मारवाडी समाजले पशुपति क्षेत्रमा आउने श्रद्धालुहरूलाई निःशुल्क भोजन सेवा उपलब्ध गराएको छ । उल्लेखनीय कुरा के छ भने, यो सेवा सोमबारका दिन मात्र नभई अन्य दिनहरूमा पनि निरन्तर प्रदान गरिनेछ ।
यस्तै, भक्तजनहरूको सहज ओहोरदोहोरका लागि कोषले यस वर्षदेखि चक्रपथ परिक्रमा क्षेत्र भित्र विशेष बस सेवा संचालनमा ल्याएको छ । चारवटा निःशुल्क बसले भक्तजनलाई चक्रपथ क्षेत्रबाट मन्दिरसम्म ल्याउने र लैजाने कार्यमा संलग्न रहनेछन् । साउन महिनाका चारै सोमबार यो सेवा अविरल रुपमा जारी रहने बताइएको छ ।
यस अवसरमा काठमाडौं उपत्यकाभरबाट सुरक्षाकर्मी परिचालन गरी मन्दिर परिसरमा कडा सुरक्षा व्यवस्था मिलाइएको छ । भिडभाड नियन्त्रण, महिला र ज्येष्ठ नागरिकका लागि सहजीकरण, प्राथमिक उपचार व्यवस्था, र स्वच्छताका लागि स्वयंसेवकहरू परिचालित गरिएको छ ।
क्याटेगोरी : समाचार
थप समाचार
धेरै पढिएका
प्रतिक्रिया