सिमरा घटनाः आज पनि प्रद्धर्शन, कफर्यु आदेश जारी, अनुसन्धानका लागि दुई वडा अध्यक्ष पक्राउ !
हेटौडा । बाराको सिमरामा हिजो बुधबारदेखि निरन्तर तनाव सिर्जना भएको छ । जेन जी समूहले आज पनि प्रदर्शन जारी राख्दा बारा प्रशासनले आज पनि कफ्र्यू आदेशलाई निरन्तरता दिएको छ । बुधबार सुरु भएको विवाद अहिले झनै उग्र बन्दै जाँदा प्रशासन, स्थानीय राजनीतिक नेतृत्व र समुदाय सबैजना दबाबमा छन् । घटनाको मूल विषय नेकपा एमालेका नेता–कार्यकर्ता र स्थानीय जेन–जी समूहबीच भएको झडप हो । तर झडपपछि उत्पन्न राजनीतिक, सुरक्षा र सामाजिक वातावरणले सिमरालाई पूर्ण रूपमा अवरुद्ध बनाइदिएको छ ।
बुधबार सिमरा विमानस्थलमा एमाले नेता शंकर पोखरेल र महेश बस्नेत चढेको विमानलाई अवतरण हुन नदिने भन्दै जेन–जी युवाहरू सडकमा उत्रिएपछि वातावरण तनावग्रस्त बनेको हो । विमान अवतरण अवरोधसँगै दुई समूहबीच मौखिक विवाद हुँदै झडप सुरु भयो ।
झडपका क्रममा ‘सम्राट्’ उपनामले चिनिने साइकुल उपाध्यायसहित केही व्यक्ति घाइते भए । उपाध्यायको किटानी जाहेरीका आधारमा प्रहरीले जीतपुर सिमरा उपमहानगरपालिका–२ का वडाध्यक्ष धनबहादुर श्रेष्ठ र वडा–६ का वडाध्यक्ष कैमुद्दिन अन्सारीलाई पक्राउ गरेको छ । उनीहरू दुवै नेकपा एमालेबाट निर्वाचित जनप्रतिनिधि हुन् । उपाध्यायले आफूहरूमाथि नियोजित रूपमा आक्रमण गरिएको आरोप लगाउँदै घटनामा संलग्न अन्य व्यक्तिहरूलाई पनि पक्राउ गर्न माग गरेका छन् ।
प्रहरीले मुद्दाको अनुसन्धान थाल्दै दुवै वडाध्यक्षको प्रारम्भिक बयान लिएको छ । जिल्ला प्रहरी कार्यालय बाराका प्रहरी उपरीक्षक सन्तोष तामाङका अनुसार, अनुसन्धानलाई थप प्रभावकारी बनाउने लक्ष्यका साथ अन्य संलग्न व्यक्तिहरूको खोजी पनि जारी भइरहेको छ । तर प्रहरीले पक्राउ प्रक्रियालाई अघि बढाए पनि सडकमा उत्रिएका जेन–जी युवाहरू अझै असन्तुष्ट देखिन्छन् । उनीहरूले हिंसामा संलग्न एमाले नेता–कार्यकर्ताहरू सबैलाई पक्राउ गर्नुपर्ने माग गर्दै सिमरा चोकमा बिहानैदेखि टायर बालेर विरोध प्रदर्शन गरिरहेका छन् ।
यही कारण सिमरा बजार पूर्णरूपमा बन्द छ । पसल, व्यवसाय, होटल, यातायात सबै ठप्प छन् । सिमरा–पथलैया सडकखण्ड अवरुद्ध भइसकेको छ र लामो तथा छोटो दूरीका सवारी साधन गुड्न सकेका छैनन् । ठूलो भीड र आक्रोशित समूहले सडक कब्जा गरेपछि प्रहरी ठूलो संख्यामा परिचालन गरिएको छ । भीड नियन्त्रणमा लिन प्रहरीले हल्का बल प्रयोग गरेको विवरण पनि सार्वजनिक भएको छ ।
स्थिति थप बिग्रिन नदिन बारा प्रशासनले बुधबार नै कफ्र्यू आदेश जारी गरेको थियो, जुन आज बिहीबार पनि निरन्तर गरिएको छ । प्रशासनले गण्डक नहरदेखि पथलैया सडकखण्डसम्म राजमार्गका दायाँ–बायाँ ५०० मिटर क्षेत्र, र सिमरा विमानस्थल परिसरका चारैतिर ५०० मिटर क्षेत्रमा कफ्र्यू लागू गरेको छ । बिहीबार पनि प्रदर्शन व्यापक बन्दै गएपछि सहायक प्रमुख जिल्ला अधिकारी छविरमण सुवेदीले १२ः४५ देखि साँझ ८ बजेसम्म कफ्र्यू जारी राखिएको जानकारी दिएका हुन् ।
सिमरामा कफ्र्यूको प्रभाव स्पष्ट रूपमा देखिन्छ । सडक सुनसान छन्, प्रहरीको बाक्लो उपस्थितिले वातावरण तनावपूर्ण छ, र स्थानीय जनता त्रासमा छन् । प्रदर्शनकारी भने आफ्नो माग पुरा नभएसम्म नरोकिने बताइरहेका छन् । उनीहरूका अनुसार एमाले नेता–कार्यकर्ताहरूले आफूहरूमाथि आक्रमण गरेको र राज्यले दोषीको बचाउ गरिरहेको महसुस भएकोले आन्दोलन जारी राख्नु बाध्यता बनेको हो ।
यता एमाले पक्षले भने जेन–जी समूहले नियोजित ढंगले वातावरण बिगारेको र विमान अवतरण अवरोध संविधानसम्मत अधिकार विपरीत रहेको आरोप लगाएका छन् । दुई पक्षबीचको आरोप–प्रत्यारोपले स्थिति झनै जटिल बन्दै गएको छ ।
प्रदर्शनका कारण सिमराको दैनिक जीवन प्रभावित मात्र भएको छैन, सुरक्षा अवस्था पनि संवेदनशील बनेको छ । बारा प्रशासन, प्रहरी र स्थानीय नेतृत्वबीचको समन्वयले मात्र स्थिति सामान्य हुन सक्ने देखिन्छ । कफ्र्यूले अस्थायी रूपमा भीडलाई नियन्त्रित गरे पनि दीर्घकालीन समाधान भने सम्बद्ध पक्षबीच संवाद, निष्पक्ष अनुसन्धान र दोषी पहिचानमा निर्भर रहनेछ । अहिलेको अवस्थाले प्रशासनलाई तीव्र र जिम्मेवार निर्णय लिन बाध्य बनाएको छ, किनकि परिस्थिति जटिल हुँदै गएको छ र सिमरा अझै केही समय तनावमुक्त हुने संकेत देखिँदैन ।
क्याटेगोरी : राजनीति
थप समाचार
धेरै पढिएका
प्रतिक्रिया