काठमाडौं । नेपाल कम्युनिष्ट पार्टी (एमाले)को ११ औँ राष्ट्रिय महाधिवेशनका आज देशैभरि प्रतिनिधि छनोट प्रक्रिया सम्पन्न भएको छ । महाधिवेशनका लागि आज देशभरि शान्तिपूर्ण रूपमा करिब दुई हजार २०० प्रतिनिधि छनोट भएका हुन् ।
नेकपा एमालेको ११औं महाधिवेशन नजिकिँदै जाँदा प्रतिनिधि छनोट प्रक्रियामा अध्यक्ष केपी शर्मा ओली समूह र ईश्वर पोखरेल समूहबीचको प्रतिस्पर्धा खुल्लै सतहमा देखिएको छ । संगठनभित्र वर्षौंदेखि दबिएको गुटगत भिडन्त यसपटक तल्लो तहसम्मै फैलिएको हो, जसको प्रत्यक्ष प्रभाव कोशी प्रदेशदेखि तराई–पहाडका धेरै जिल्लामा देखाप¥यो । महाधिवेशनलाई लक्षित गर्दै दुवै पक्षले आफ्ना प्यानल बनाएर मैदानमा उत्रिँदा कतिपय ठाउँमा कडा प्रतिस्पर्धा मात्र होइन, विवाद र झडपका घटनासमेत देखिए ।
जसको कारण छिटफुट रूपमा प्रतिनिधि छनोट प्रक्रिया रोकिएका छन् । ती रोकिएका ठाउँहरुमा निर्वाचनबाट टुङ्ग्याउने निर्देशन दिएको प्रवक्ता गौतमले बताए । गौतमका अनुसार एक प्रतिनिधि निर्वाचन क्षेत्रबाट खुला, महिला र युवा गरी चार जना प्रतिनिधि छनोट हुनेछन् ।
प्रतिनिधि छनौट प्रक्रियामा पहाडी जिल्लाहरूको अवस्था तुलनात्मक रूपमा शान्त रह्यो । ताप्लेजुङ, पाँचथर, इलाम, तेह्रथुम, खोटाङ र सोलुखुम्बुमा प्रतिनिधि निर्विरोध छनोट भए । तर धनकुटा र ओखलढुंगामा भने विवादले निर्वाचन प्रभावित भयो । धनकुटामा मतपत्र च्यातिएका घटनाले आन्तरिक तनावको गहिराई कति छ भन्ने प्रष्ट देखायो भने ओखलढुंगामा खसेभन्दा बढी मत देखिएको आरोपले प्रक्रियामाथि नै प्रश्न चिन्ह खडा भएको छ ।
प्रतिस्पर्धा भएका जिल्लामध्ये पूर्वका मोरङ र झापा केन्द्रबिन्दु बने । पोखरेल पक्षका नेता विनोद ढकालको प्रभावक्षेत्र मोरङ क्षेत्र नं ६ मा पोखरेल समूहले ‘क्लिन स्वीप’ गरे । ढकाल स्वयंले १,५२७ मतसहित उच्च मत ल्याउँदै शीर्षस्थ स्थान पाए भने सोही प्यानलका पितकुमार श्रेष्ठ, रमेशकुमार पोखरेल र सत्यनारायण चौधरी पनि विजयी भए । महिला र युवा दुवै कोटामा पोखरेल प्यानलका उम्मेदवार विजयी भएपछि मोरङ ६ पोखरेल पक्षको महत्वपूर्ण गढजस्तै बन्यो ।
उता झापा भने अध्यक्ष ओलीको गृहजिल्ला समेत भएको हुँदा ओली समूह सबैभन्दा मजबुत देखियो । झापा क्षेत्र नं १, ३, ४ र ५ सबैमा संस्थापन पक्षले निर्णायक विजय हात पारे । खुला, महिला र युवा सबै तहमा ओली पक्षका उम्मेदवार विजयी भए । दुई दलित प्रतिनिधि सर्वसम्मत रहे पनि बाँकी ३६ पदमा भएको प्रतिस्पर्धामा ओली समूहले बहुमत निकालेको देखियो ।
इलाममा भने दुवै समूहले सहमतिको बाटो रोजे । इलाम–१ र इलाम–२ का सबै प्रतिनिधि सर्वसम्मत चयन भए । खुला, महिला, युवा र दलित सबै कोटामा बिना विवाद प्रतिनिधि चयन हुनु कोशीभित्रको दुर्लभ उदाहरण बनेको छ । यद्यपि यसले इलाममा प्रत्यक्ष भिडन्त नभए पनि दुवै पक्षले भविष्यका समीकरणलाई ध्यानमा राखेर सहमतिको मार्ग अपनाएको देखिन्छ ।
यी सबै घटनाले एमालेभित्र ओली र पोखरेल समूहबीचको प्रतिस्पर्धा अब शीर्ष नेतृत्वमा सीमित नरही तल्लो तहका संरचनासम्म फैलिएको स्पष्ट संकेत गर्छ । कोशीका धेरै जिल्लामा दुवै पक्षले आफूलाई बलियो देखाउन कम्मर कसेर लागेको देखियो । संस्थापन पक्षले आफूले अधिकांश प्रतिनिधि जितेको दाबी गरिरहेको छ भने पोखरेल समूहले पनि पर्याप्त आधार तयार गर्न सफल भएको दाबी गर्दैछ ।
एमाले केन्द्रीय प्रचार तथा प्रकाशन विभागका प्रमुख राजेन्द्र गौतमका अनुसार संघीय निर्वाचन क्षेत्रमार्फत खुला, महिला, दलित र युवा कोटामा झण्डै २ हजार प्रतिनिधि चयन हुँदैछन् । प्रवास, विभाग, जनसंगठन, थरूहटरबागमती संरचना लगायतका संयन्त्रबाट थप करिब १०० प्रतिनिधि आउनेछन्। मनोनयन, निर्वाचन र विभिन्न संरचनाको संयोजनसँगै करिब २२ सय प्रतिनिधि एघारौँ महाधिवेशनमा सहभागी हुने अनुमान गरिएको छ ।
पार्टीले हाल सार्वजनिक गरेको तथ्यांक अनुसार एमालेको कुल संगठित सदस्य संख्या ६ लाख ६७ हजार ६३० छ । यसैको आधारमा प्रदेश संरचनाबाट ४५, संघीय निर्वाचन क्षेत्रबाट करिब ९७०, विशेष जिल्लाबाट ४७, दलित संरचनाबाट ८१, ट्रेड युनियनबाट ४९, प्रवास तथा विभिन्न विभाग–जनसंगठनबाट गरी १९ सयभन्दा बढी प्रतिनिधि रहने अनुमान गरिएको छ । साथै कुल प्रतिनिधिको पा“च प्रतिशत सदस्य केन्द्रीय कमिटीले मनोनयन गर्ने प्रावधान पनि छ ।
यी सबै मिलाएर हेर्दा एमालेको आगामी एघारौं महाधिवेशनमा २१ सयभन्दा बढी प्रतिनिधि सहभागी हुने पक्का देखिएको छ । केही संरचनाबाट प्रतिनिधि थपिए पनि समग्र अनुपात केही घटाइएको गौतमले बताए । मंसिर २७ देखि २९ गतेसम्म काठमाडौंमा आयोजना हुने महाधिवेशनले पार्टीभित्रको नेतृत्व पुनर्संरचना, नीतिगत बहस र आगामी पा“च वर्षको मार्गचित्र निर्धारण गर्ने अपेक्षा राखिएको छ ।
एमाले प्रचार विभाग प्रमुख राजेन्द्र गौतमले सबैजसो कमिटीमा मंसिर १३ गते शनिवार प्रतिनिधि छनोट सम्पन्न भएको बताए । धेरैजसो कमिटीमा सर्वसम्मत रूपमा प्रतिनिधि छनोट भए पनि केही ठाउँमा निर्वाचनको माध्यमबाट प्रतिनिधि छनोट भएको” उनले जानकारी दिएका छन् ।
छनोट भएका प्रतिनिधि विवरण यही मङ्सिर १५ गतेभित्र पार्टी केन्द्रीय कार्यालयमा पठाइसक्न एमालेले निर्देशन दिएको छ । एमालेले यही मङ्सिर २७ देखि २९ गतेसम्म भक्तपुरमा महाधिवेशन हुने जनाएको छ ।
क्याटेगोरी : राजनीति
थप समाचार
धेरै पढिएका
प्रतिक्रिया